你哋真係咁憎我哋？

沒錯，特別係人生典範嗰位。平時都係憎，今日係十級憎。

封關都算啦，五個幾月唔封關都做到幾次連續十幾日無本地確診，出左豁免令害死唔少人，結果唔堵截源頭而係搵餐飲業開刀限聚令加辣，咩道理？我覺得打擊黃色經濟圈兼為選舉延期鋪路囉，正Cheap精。

喂，我地守左半年有多啦

日日好開心嘅豚豚今日心情麻麻，因為連續三日無落街。咪以為BB唔懂性，我深知她只係想去樓下公園魚池睇下魚啫，有齊防疫設備，不過呢幾日百幾單確診，有兩單在隔鄰座，你夠膽搏命嗎？

全球都係捱著打，對面台灣重振經濟，我們仲喺屋企期盼煲底除罩相會。

我們睇到的，人家當然睇到，只是唔肯做，出左事咪潛晒水囉。張司長呼籲我地Call Apps等外賣食，外賣員地盤佬中午去邊度食？室外除罩即犯法，你估人地可以返屋企食？（以前有一位同事屋企在公司對面的屋苑，幾幸福）

WFH可謂少許幸福，減少左傳染機會嘅，可是用住部2011年MBA效率真係WTF，家用當軍用，細MON Remote公司部大MON 字細到老花睇唔清楚，用兩個幾鐘就要差電，長插電又唔方便。最攞命都係同事無晒交流，做到CHUR會搵隔離同事吹水笠零食，有嘢唔識做走埋嗰位問兩句，會議幾有火藥味總之SET傾好晒Target動手做。家陣用電話定會議Apps開會，成日話聽唔到，又話我屋企回音大，其實我為方便用藍芽耳機啫，最後都要揸住部電話講嘢Holland Bank Cheque。新同事嚟到都未見過除罩嘅樣，就咁劈炮走左。

圖書館唔開，同豚豚狂LOOP借番嚟那幾本故仔書，發現用唔同角度講故仔，有唔同效果噃，大前提係要對本書好熟好熟先得。不過當你熟左本書，就會面對資料取捨問題，明明應該跳過無關重要嘅細節位，覺得自己永遠No.1，結果講晒出嚟，令故仔效果變得零碎。詳細另文詳述。

關自己事嘅書買左唔少嘅，例如以下呢本。我其實幾似作者囉，想法積極卻越做越消極，結果肚腩露晒出嚟。