韓國對德國

有誰想到會是這個結果？德國只要入一球就可以出線，不過每到重要關頭，總是變得保守。看看韓國隊，就算自己幾咁屎波，付出百分百的戰意最重要，尊重比賽，也尊重自己。

雖然我幾憎德國隊，但呢個時候也不想落井下石，不如叫Viu TV改播另一場十六強啦，邊有人睇雙瑞大戰(瑞典對瑞士)呢？

英格蘭對巴拿馬

英格蘭大勝預料之內，下半場走樣預左啦，就算攻到十比零無意思，咪玩嘢囉。不過英軍成功追近比利時的得失球差，巴拿馬成功入史上首球，大家各取所需，皆大歡喜。

哥倫比亞對日本

晚飯期間和媽子討論過，呢場波日本一定勝出，因為星期一大阪發生大地震。我相信當全國人民也渴望求勝，一洗連日的頹氣。

天災無情，人間有愛，日本人加油！

突尼西亞對英格蘭

哈利簡尼成功絕殺突尼西亞的一刻，我沒有很興奮，反而鬆一口氣，因為下場對巴拿馬，面對的又係一個鐵桶陣，當佢地打和，最後點對比利時？

今屆英格蘭唔廢、唔悶，踢波玩小組，玩迫搶，最重要的是齊心。對住鐵桶陣，用番最直接的方法攻門，毋須想太多，扭花和溜後的嘢，留番打聯賽用。

不枉我買左件英格蘭Polo衫支持他們，惟下場我唔想見到史達寧正選。

德國對墨西哥

我唔鍾意德國隊，見證到德國輸比西班牙和意大利，心裡好Q爽。

今日德國輸波，輸比低一班波的墨西哥，真係好「很」Q爽。

就算幾唔鍾意德國，淨係睇頭廿幾分鐘都覺得佢地有異樣，連唔識波的太太都覺得佢地狀態好差囉。不過德國究竟是廢柴定扮豬食老虎，睇埋下輪對瑞典再講。

憎還憎，我唔相信佢地分組賽出局囉。

阿根廷對冰島

呢場波就像以往睇利物浦的比賽，係咁㩒平安鐘，因為我捧冰島啊。阿根廷係咁攻阿攻，下半場美斯射十二碼宴客，你話驚唔驚？

當其它國家隊的隊員來自英超西甲義甲或當地的等聯賽，但冰島大部分球員，都要返工搵食，踢完歐國盃淘汰賽，又有資格踢世界盃分組賽，所以佢地人如其名，真係好「臣」。

葡萄牙對西班牙

呢場C朗救全家啊！最後準備罰球的殺氣眼神，難以忘記。講真葡萄牙隊沒有豬隊友，不過哥斯達的個人突破好厲害，連比比也撞跌。

只是西班牙葫蘆裡賣什麼藥呢？我覺得希亞路好多嘢想做，但唔知點樣做。不過他臨危受命，無得要求太多嘅。

埃及對烏拉圭

埃及踢左一場好波，但好波不代表笑到最後，烏拉圭一個罰球，把八十幾分鐘的努力瞬間抺走。

埃及的進攻患得患失，期間總會想起場外的沙拿，看見埃及球員有系統地守護防線，我相信這一塊拼圖，應該能改寫戰果。