由於工作和家庭忙碌,半夜三更最想彈琴,所以上網bid部二手數碼鋼琴。原主聲稱用咗幾個星期後,變成家裡的擺設幾年了,最近要搬屋才決定放出去,我卻冷手救左部琴返屋企,等佢唔駛繼續做出土文物。

樂器生產商推出數碼鋼琴,其實解決價格和土地呢兩個問題。一部傳統鋼琴閒閒地幾萬蚊,一部管弦樂器只需幾百蚊到幾千蚊。鋼琴必須單對單教授,其它樂器可以小組教學。中小學校為讓學生廉價學音樂,唔駛問梗係學管弦樂啦。

由於鋼琴賭本咁大,生產商要諗盡辦法降低成本,於是出現左傳統鋼琴和電子琴之間的產物 – 數碼鋼琴。將所有木製的琴身琴鍵琴槌以及金屬弦線和共鳴板,變成一份電子底板連鍵盤的膠面鋼琴,價錢只是傳統鋼琴三分之一,係咪福音呢!

插耳筒便能不打擾別人之下亂彈琴,簡直是數碼鋼琴最有用的功能。試諗下家陣我地D屋越住越細,不斷反覆又反覆彈同一段歌仔,真係幾煩嘅。至於轉樂器聲功能,其實玩下貪過癮,真正用都係鋼琴聲。

傳統鋼琴真係天價吖

雖然有數碼鋼琴,但始終念念不忘我的傳統鋼琴。這個世代乜Q都要數碼化,舊嘅嘢統統被淘汰,偏偏有一些地方數碼鋼琴是無法取代傳統鋼琴。

我覺得數碼琴適用於彈流行歌或爵士歌,立志學古典音樂嘅話,我建議平平地搵部二手傳統鋼琴。因為古典音樂講究音色,數碼鋼琴的琴鍵太輕,太容易彈出甜美嘅聲音,不費吹灰之力就可以彈強音,偏偏這些技巧在傳統鋼琴上要用唔同方法chok出嚟……咦,根本是讚緊數碼鋼琴呢?

皇家考試或是音樂節比賽用傳統鋼琴吖!大佬!

數碼鋼琴也有三角琴的樣子

成功靠苦幹,但也要揀啱嘢用。真係用數碼鋼琴嘅話,最好每個禮拜抽一至兩小時租琴房練習,集中練習力度。

總有一天,我們因某些原因不能學琴,與其做擺設,不如轉讓出去。今時今日嘅香港,仍然有好多人覺得學琴係升學基本入場券,只要琴鍵沒壞,音色良好,絕對是搶手貨。就算差D,平價放比佢地也好,說不定造就下一位李嘉齡和黃家正。