我都算係好幸福㗎啦，去拜山都唔太需要好山長水遠，唔使點迫車。由屯門出發，拎住幾袋嘢，搭咗唔知幾多個地鐵站到柴灣，就到達我未見過真人嘅爺爺墓碑。
那個係最傳統的土葬，要除雜草，抹墓碑，放貢品，上香，燒埋衣紙。唔知泉下嘅長輩識唔識用電子支付呢？下次燒埋個Apps同埋電話俾你啦。不過似乎黃金實際啲……其實要地最實際，可是而家一塊地盛惠幾十萬。
隨著時間過去，除了爺爺之外，我在同一個山頭繼續拜祭另外兩位長輩。佢地的祭祀方式各有不同。而家新丁入伙紛紛改睡在靈灰閣裡，我哋有嘢燒俾佢哋嘅話，則用Gulu攞飛等安排。時至今日交通方便，上山可以搭扶手電梯直達，唔一定等清明重陽先去，不過平日點會無啦啦去呢。
等燒衣就係聽老豆講古，呢啲嘢平時係會講㗎。我知道以前佢哋background好犀利，可是社會問題家道中落。嗰陣長輩們字都唔識多個，都可以靠自身努力，做一啲令我哋驕傲嘅事。
我諗排唔到燒衣，買唔到肥叉燒鵝，對長輩們都唔緊要。佢哋知道我哋記得佢哋做過嘅嘢，先至係最重要嘅寶物。
