我有幾耐未玩過桌遊？其實我一直有玩，不過機會隨住年紀增長越來越少。
細細個就會玩飛行棋、中國象棋、波子棋等。後來就會有啲講求錢金錢運用嘅遊戲，例如大富翁同埋酒店大亨。之後就識得一啲嘅同事帶嚟更加好玩嘅遊戲，矮人掘金、牛頭王等。桌遊唔一定有輸贏，可以係大家一齊合作完成一項任務。
玩桌遊都要講緣份，唔係個個人都肯一齊玩，所以有人撩我玩，我會特別珍惜。而家阿女大個咗，可以同佢一齊玩啲簡單嘅遊戲。嗰陣新年舅父教過佢玩圍棋，之後佢食上癮，我係咁輸俾佢，結果要抽時間睇書同佢抗衡。
最近有幸獲得一副大富翁，諗住收埋佢，過多幾年先教阿女玩。經過阿女一連串央求，我最後准許開箱。嗰個版本金額細得多，規模縮細咗，只要了解規則就好快掌握。阿女最近在學校學識買嘢，佢知道買咗塊地，可以收租賺錢。嗰日全家玩咗三局，期間我率先破紀錄，一個圈都未行完就破產啦。
透過桌遊，希望佢明白幸福唔係必然，有贏有輸，縱使今天被打敗嘅時候都會喊。
乜鬼「輸贏唔緊要，過程係重點」，唔開心咪唔開心囉。