這幾天是小一註冊日，我需要親身到學校交錢，預備開學用途。原來而家小一上學期嘅書費，竟然拍得住我當初中一全買新書嘅價錢。怎會有舊書呢，惟有乖乖訂咗書。又估唔到在註冊日可以即場在學校攞書走，於是八啩一下阿豚將會學啲咩。
曾幾何時社會科學及健教三科，廿幾年前合併為常識課，最近變成科學和人文兩科。科學有啲喺健教讀過，有啲教科學現象嘅。社會變成人文科，先關心學校繼而了解社會及世界，諗起最經典係問親都答錯嘅家庭關係圖，當時我唔明點解爸爸嘅媽媽係阿嫲（諗緊爸爸+媽媽=？on top 加咗媽媽點解變成阿嫲）。
中英數頗接近而家幼稚園學緊嘅嘢。英文不過多咗Phonics，到時全英語教學。不過阿女學校用嘅書無咗肥仔Peter同埋馬尾Betty。數學上學期重溫，不過最麻煩都係文字題呢啲嘢，其實考閱讀理解多過計數。
中文應該係最難吧，我哋會好好努力學習，特別係寫字。大佬，以前寫個「電」字，嗰田字不穿頭，而家寫啱呢要穿少少頭。不過睇中電網站，「電」字是沒穿頭的。慶幸阿豚肯寫字同睇書，不過估作者嘅意思又係另一回事囉。