Altas 圖書
世界盃除咗可以睇足球學睇越位之外，仲可以比阿女認識到唔少嘅國家。
阿女學校教國家嘅英文詞語，當中竟然包括美國、墨西哥，同埋加拿大，偏偏就係今屆世界盃嘅三個主辦國。我就打蛇隨棍上，買咗本世界盃刊，在書櫃搵到最近人哋送比我哋嘅世界地圖書。
美國啱啱對完嘅巴拉圭，就係喺南美洲嘅。佢隔離嘅國家阿根廷，有入咗六球波嘅美斯。遠少少嘅南韓殘忍地被慢性出局，對面嘅日本今晚三十二強對巴西。
再引申多少少可以講世界大事，咪睇小細路仔，朝朝睇新聞，都可以同我簡單講美國同伊朗關係唔好。
汪喵偵探
最近留意到小學學校嘅教科書，篇幅似幾何級數向上升，開始為佢分享有番咁上下字數嘅書，坊間稱為「橋樑書」。
從阿豚喜歡的《屁屁偵探》開始，引申《汪喵偵探》，到佢嘅程度提升，就可以睇《大偵探福爾摩斯》，當然我未俾佢睇真嘅福爾摩斯故仔啦。講番《汪喵偵探》，它有兩輯，都係由一隻由主人飼養的一對肥貓及瘦狗，當主人離開家裡，佢哋就會經秘密通道變身，成為有獨特技能嘅偵探。佢哋嘅目標係破502單案，然後退休。由於成功達標，原本嘅組合真係退休，所以第二輯換成另一對貓狗偵探組合，繼續長做長有。
無論多字定少字，要陪佢一齊睇可以口語略讀，或者選擇佢鍾意嘅一頁一字一句讀。之後可以請佢分享對本書感到喜歡，或是討厭嘅原因。
鬱金香旅社
喺香港staycation ，我諗都因為和康文署與別不同嘅游泳池，或者係延續幻想體驗吧。
有親戚一家大細從遠方過嚟，諗住約佢哋去過屯門黃金泳灘，然後上我或者阿媽屋企繼續盡興，結果演變成去黃金海岸酒店過夜。
這是我第一次去嗰度住，雖然留喺酒店嘅時間唔算好長，但印象幾深刻。特別朝早七點幾，走出露台望住沙灘，真係好舒服。唔想太熱，最好下午五點左右去沙灘，然後回酒店梳洗，晚上在附近商場吃過飯，翌日吃完早餐到泳池游水，中午check out 就差好電返屋企啦。
有機會想住吓鬱金香旅社，住完一晚全身香噴噴。都係做老闆好，任得開花吸客，凋謝咗就去第二度種，唔駛拆樓或重新裝修。
酒店想吸引我哋住多一次，互動成份真係要加強吓。細路睇到《鬱金香旅社》好多嘢玩，但真實情況最多嘅設施係扭蛋機，飄書區少書都算但位置缺乏光線，其實攞其中一間舖頭，擺少幾部扭蛋機就成事。
跟著皇帝遊故宮
某一天阿女跟學校參觀故宮博物館，我同太太同一日都去故宮，不過我哋沒遇上，因為我哋喺唔同時段去。
當晚一家齊齊講番參觀嘅事物，我哋主要去咗埃及展，然後掃晒全部可以免費嘅展覽廳。阿女原來參觀宮廷人員的衣著，大概學校比佢哋認識，為稍後畢業表演做準備。聽講表演裡有皇帝、宮女和劍士，而阿女安排做旗手。不過表演做乜，等到畢業典禮先知道啦。
嗰日參觀完展覽，逛咗商店，睇吓嗰隻大受歡迎嘅埃及貓，不過我哋被呢套書深深吸引咗。成套書有四冊，介紹宮廷裡嘅一切，例如皇帝嘅一日生活流程，人物畫得好Q，資訊量適中，於是當日在圖書館借番嚟睇。
Dog Man
最唔想跟阿女共讀嘅書，Dog Man係其中之一，因為我分飾幾個角色，故仔又長，講到啲當地人明嘅gag或訴說大道理，我未必即刻諗到點樣講先至令到阿女明白。加埋故事時間係全宣人臨瞓前，是我好鬼眼瞓嘅時候。
初初我唔明Dog Man有咩咁好睇，有次老豆陪阿女去圖書館就隨便借比佢睇，佢就覺得好攪笑。然後有次在二手書義賣活動，幾個細路喺個櫃見到幾多就掃晒咁多。一手百幾蚊本，二手十蚊本，仲要好新淨。於是我就睇吓啦，結果一發不可收拾，佢係好好好好好好好睇。
用細路仔嘅角度，講啲連大人也會忽略嘅問題。面對外星怪物侵略地球，佢哋會用好低能但make sense嘅方法解決危機。實在喺中二病之選。
其實Dog Man 有中文版，奉勸各位睇番英文版。中文版嘅字體睇得超辛苦，而且書名譯做《超狗神探》，雖然dog man 係警察但佢都唔查案，九唔搭八。
