今天我是一粒黃豆
幾年前一場疫情，日日留喺屋企無嘢做，係咁研究煮嘢食，其中一樣就係「做豆腐」。
最近阿女學校攪黃豆專題研習，佢哋竟然學到嘅超越咗我哋嘅想像。佢在某天學校午餐食腐乳意大利粉；老師買咗石磨，佢和同學仔幫手磨豆漿；去深水埗公和參加黃豆活動，期間整豆腐花作茶點。聽吓聽吓，我想再啟動早已封塵嘅整豆腐計劃。
喺圖書館搵到很多以自然或美食嘅角度介紹黃豆嘅書，估唔到有作者將母女之情，同黃豆拉上關係。小妹妹唔肯瞓覺，佢將自己變成一粒黃豆，然後演化成各種豆類食品，最後變出大頭佛。
呢本好得意嘅書，睇完應該想即刻落街買碗豆腐花。
Richard Scarry
自從喺東京圖書館有Richard Scarry的書，就成為咗阿女喺圖書館借完又借，借完又再借嘅其中一本書。
由於Richard Scarry已經唔再出新書，各大書局都冇乜佢嘅書，要睇嘅就得番圖書館或者係二手書。BusyTown系列最啱用嚟臨瞓講故事，想學多啲英文睇扮偵探搵珠鏈，或者騎士救公主。
Richard Scarry嘅書唔止係得識數、ABC或者日常用詞，佢可以同我哋分享飛行理論，造紙過程，水循環等，幾高深哩。有啲故仔都幾得意，例如大夥兒幫手湊仔，期間肚餓去咗廚房整蛋糕，點知唔小心攪到間屋「麵粉大爆炸」，即刻要搵消防員射水清理垃圾。阿媽返嚟不但無嬲到爆炸，反而整個蛋糕答謝佢哋幫手清潔間屋。
工作細胞
年前讀Fitness第一個course 教人體結構，等於我以前上Bio咁雲遊太虛。如果有生動有趣嘅書，一睇就明就好啦。
直到而家出現了《工作細胞》。
將紅血球和白血球等身體細胞事物擬人化，紅血球係御姐，白血球係幼齒，將止血嘅步驟變成一集動畫，啲人睇咗呢套就輕鬆即刻知道佢嘅運作，你話幾好呢？
講感冒嗰度都落足功夫㗎，細胞將啲細菌同病毒打敗咗，就將佢擠落去「噴嚏1號」嘅火箭。之後係點呢？我諗你哋應該知道啦。
崔麗君春夏秋冬系列
疫情期間，我哋冇辦法去圖書館借書，或者喺書局溫書，唯有上網買咗好多書。呢套應該係我因為畫功了得就買咗返嚟。
呢位作者大概每年就出一本同季節有關嘅圖書，我當時真係逐本買。睇《交換禮物》就發現出邊得10零度，我就喺屋企嗰被竇。睇《食西瓜》，就發現自己喺河流附近，有幾陣涼風吹過。至於春天和秋天有點天馬行空，可能天氣太舒服吧，舒服到瞓咗喺隻貓度都唔知道。
淨係睇圖畫，就有咁深刻嘅感受，呢啲就係作者功力深厚。
忽然間，好想食西瓜哦。
