嗰度搭11號巴士去到嗎？嗰度係大澳吖。
咁搭地鐵咪去到囉……嗰度係鴨脷洲。
我講緊嘅係吉澳和鴨洲，佢哋係新界最東北嘅小島。我哋第三次去啦，以往喺馬料水搭船用兩個鐘，今次改由沙頭角上船，只要四十分鐘左右抵達，不過事前必須申請禁區證入沙頭角。適逢天后誕和保育團體在呢個島攪藝術遊，呢日睇到嘅嘢應該有啲唔同啩。
鴨洲和吉澳嘅最大特色，可能只有當地人先至明白，我哋外人最有印象，應該係阿婆茶粿，我講緊係近住天后廟嗰檔。我覺得佢好食過大澳嗰堆。豚豚唔鍾意食啲黑麻麻嘅嘢，竟然食咗兩個，我買咗糯米糍同樣好食。阿爸阿媽嫌買得太少茶粿，明明要齊兩款味道，竟然執錯花生味。
明嘅，紅豆味茶粿要留番下次請我哋食。
疫情之前，有好多好多本地團包船遊覽呢啲島仔，晏晝安排團友喺島上嘅酒樓食圍餐，四十幾圍全部坐滿。團友自由活動過後，坐船去第二度。依家我哋十二點幾去酒樓，只有兩枱做散客嘅遊客，無晒本地團。
明嘅，對面嘅地方的確比較五光十色，好玩好多嘅。
豚豚將來未必記得去過鴨洲，佢可能記得喺嗰海有好多水母，以及海邊掟石仔打水飄。前嗰幾次我哋都只係喺架船度睇鴨頭，今次終於可以親身上岸睇鴨頭，比阿女知道香港有紅色嘅石頭，自然形成橫紋嘅岩石，滴水真係可以穿石（鴨頭真係咁樣形成）。我哋仲想去睇故事館，以及上觀景台睇全景呢。
明嘅，要趕船返屋企，瞓陣先，到咗沙頭角叫醒你。
